ខ្ញុំជាមន្ត្រីនាយកដ្ឋានអភិវឌ្ឍន៍វារីវប្បកម្មនៃរដ្ឋបាលជលផលកម្ពុជា។ ក្នុងរយៈពេល០៧ឆ្នាំចុងក្រោយនេះ ខ្ញុំបានធ្វើការងារលើការស្រាវជ្រាវ និងអភិរក្សជលផល ការងារអភិវឌ្ឍន៍វារីវប្បកម្ម ក៏ដូចជាការអភិវឌ្ឍន៍ជនបទ សន្តិសុខស្បៀង និងអាហារូបត្ថម្ភជាដើម។ ខ្ញុំពេញចិត្តនឹងការងាររបស់ខ្ញុំខ្លាំងណាស់ ព្រោះខ្ញុំដឹងថាកិច្ចខិតខំប្រឹងប្រែងរបស់ខ្ញុំលើការអភិវឌ្ឍន៍វារីវប្បកម្ម អាចជួយដល់ការប្រកបរបរចិញ្ចឹមជីវិតរបស់ប្រជាជន និងកាត់បន្ថយសម្ពាធយ៉ាងខ្លាំងមួយទៅលើធនធានធម្មជាតិ។ ការគំរាមកំហែងជាច្រើនបានរុញច្រានប្រភេទត្រីមួយចំនួនឱ្យខិតជិតដល់ការផុតពូជ។ ដូច្នេះ វារីវប្បកម្មអាចដើរតួនាទីយ៉ាងសំខាន់ក្នុងការអភិរក្ស និងជួយបង្កើនចំនួនត្រីក្នុងធម្មជាតិឡើងវិញ។ ការងាររបស់ខ្ញុំទាក់ទងនឹងការស្រាវជ្រាវ ផ្សព្វផ្សាយ និងផ្តល់ការបណ្តុះបណ្តាលស្តីពី បច្ចេកទេសវារីវប្បកម្មដល់វារីវប្បករ និងអ្នកផ្សេងទៀតដែលមានចំណាប់អារម្មណ៍។ ខ្ញុំក៏ចិញ្ចឹម ថែបំប៉នកូនត្រីដែលប្រមូលបានពីទន្លេមេគង្គ ព្រមទាំងប្រភេទត្រីជិតផុតពូជ ដែលអ្នកនេសាទ និងវារីវប្បករដទៃ ទៀតបានប្រគល់មកឱ្យគម្រោងរបស់យើង។ ត្រីទាំងនេះត្រូវបានចិញ្ចឹមថែបំប៉ននៅក្នុងស្រះពិសោធន៍ ហើយខ្ញុំ និងក្រុមការងារតាមដានការលូតលាស់របស់ពួកវារៀងរាល់ខែ។ ត្រីមួយចំនួន ត្រូវបានព្រលែង ចូលទៅធម្មជាតិវិញ ដើម្បីបង្កើនផលស្តុកនៅក្នុងធម្មជាតិ ហើយមួយចំនួនទៀតអាចប្រើប្រាស់ជាត្រីមេពូជក្នុងការស្រាវជ្រាវ និងការបង្កាត់ ភ្ញាស់។