ទន្លេមេគង្គត្រូវបានប៉ាន់ប្រមាណថាផ្តល់ជម្រកដល់ប្រភេទត្រីយ៉ាងតិច ១១០០ ប្រភេទ។ ប្រភេទត្រីខ្លះមានច្រើននៅលើតំបន់ទំនាបលិចទឹក (តំបន់ដីសើម) ខ្លះទៀតចូលចិត្តតំបន់ទន្លេទំនាប និងខ្លះទៀតត្រូវបានគេរកឃើញនៅដៃទន្លេ ប៉ុន្តែប្រភេទត្រីជាច្រើនធ្វើចំណាកស្រុករវាងជំរកផ្សេងៗគ្នាដើម្បីបន្តពូជ រកចំណី ពងកូន និងបំពេញវដ្តជីវិតរបស់ពួកវា។តែអ្នកដឹងទេថា ប្រភេទត្រីទាំងអស់នេះកំពុងប្រឈមនឹងបញ្ហាមួយចំនួនក្នុងអំឡុងពេលធ្វើចរាចរផ្លាស់ទីរបស់ពួកគេរួមមាន សកម្មភាពនេសាទហួសកំរិត ប្រើប្រាស់ឧបករណ៍នេសាទខុសច្បាប់ ការសាងសង់ទំនប់វារីអគ្គិសនីជាដើម។ ដោយលេងល្បែងកាតនេសាទ អ្នកលេងនឹងទទួលបានចំណេះដឹងបន្ថែមអំពីអ្នកអភិរក្ស តំបន់ការពារ និងសារៈសំខាន់នៃទឹកជំនន់ដែលអាចរក្សាការនេសាទប្រកបដោយចីរភាព។ល្បែងនេះក៏តំណាងឱ្យជីវភាពរស់នៅរបស់ប្រជាជនក្នុងតំបន់ផងដែរដោយសារតែការនេសាទបានក្លាយជាប្រពៃណីមួយរបស់ពួកគេសម្រាប់ការប្រកបរបរចិញ្ចឹមជីវិត ជាពិសេសប្រជាជនដែលរស់នៅតាមដងទន្លេ។

របៀបលេងល្បែងកាតនេសាទនេះគឺ តម្រូវឱ្យមានអ្នកលេងពីរនាក់ដែលអ្នកលេងម្នាក់ដើរតួជា អ្នកនេសាទ និងម្នាក់ទៀតដើរតួជាត្រី។ ហើយពួកគេម្នាក់ៗនឹងទទួលបានសន្លឹកកាតចំនួន ៣ ប្រភេទដូចជាសន្លឹកកាតតួអង្គ សន្លឹកកាតពិសេស និងសន្លឹកកាតបន្ទាន់។

ដើម្បីឈ្នះល្បែងកាតនេសាទអ្នកលេងម្នាក់ៗត្រូវប្រមូលសន្លឹកកាតរបស់គូប្រជែងរបស់ពួកគេឱ្យបានច្រើនតាមតែអាចធ្វើទៅបាន ប៉ុន្តែអ្នកលេងត្រូវតែដឹងថាពួកគេត្រូវប្រើប្រាស់សន្លឹកកាតរបស់ពួកគេឱ្យបានត្រឹមត្រូវ ដើម្បីអាចបន្តទៅមុខទៀតនៅក្នុងល្បែងកាតនេសាទ។ សន្លឹកកាតដែលពួកគេប្រមូលបានកាន់តែច្រើន ពួកគេមានឱកាសកាន់តែច្រើនដើម្បីផ្លាស់ប្តូរយកសន្លឹកកាតកំណប់ដើម្បីក្លាយជាអ្នកឈ្នះ។ ទៅស្ទូចត្រី! ទៅពងកូន! រស់រានប្រកបដោយនិរន្តរភាព!

ចុចនៅទីនេះដើម្បីទាញយក “ល្បែងកាតនេសាទ”